Laqgħa 5 - Is-Sesswalità Tagħna

Meta koppja għarajjes jibdew jaħsbu għaż-żwieġ, tajjeb li jirriflettu fuq l-esperjenzi u l-aspettazzjonijiet li għandhom dwar is-sesswalità, b’mod matur u responsabbli.

It-tifsira u l-iskop ta' Alla għall-imħabba sesswali

Alla ħoloq il-bniedem bħala għaqda ta’ ġisem u ruh. Dan ifisser li ġisem-il bniedem m’huwa qatt ‘xi ħaġa’, iżda xi ħadd li għandu sehem fid-dinjita’ tal-immaġni ta’ Alla.

Wieħed mill-għanijiet li Alla ħoloq il-bniedem f’għaqda ta’ ġisem u ruh huwa dak li l-bnedmin joħolqu relazzjonijiet ta’ mħabba bejniethom, u b’riżultat jipprokrejaw l-ulied li jkunu kapaċi jagħrfu lil Alla u jħobbuh. 

Bħala koppji għarajjes u miżżewġin, aħna msejħa biex inħobbu bl-istess mod kif iħobb Alla. Din hija l-marka mnaqqxa fina. Fil-bidu, Adam u Eva ħabbew b’dan il-mod. Qalbhom kienet konformi mal-pjan ta’ Alla, sakemm id-dnub kisser il-purita’ tal-għaqda tagħhom.

Alla ħoloq il-bniedem bħala raġel u mara

Alla ħoloq il-maskili u femminili biex jiżvela n-natura spiritwali tagħna u biex nipparteċipaw fil-ħolqien Tiegħu ta’ ħajja ġdida. Il-Knisja tgħallimna li l-imħabba sesswali hija espressjoni profonda tan-natura tagħna f’għaqda ta’ ġisem u ruh, kif aħna maħluqa fl-immaġni ta’ Alla. 
Is-sesswalità hija t-totalità tal-aspett maskili u femminili, li tmur ferm lil hinn mid-differenzi li naraw fl-organi sesswali. Ir-raġel u l-mara huma maħluqa differenti ħafna minn xulxin. Għalkemm Alla rrivelalna bħala missier, li Hu t-totalità ta’ dak kollu li hu maskili u femminili. Alla huwa sħiħ. Bl-istess mod, Alla fl-għerf infinit tiegħu ħoloq ir-raġel u l-mara kumplimentari għal xulxin. Dan ifisser li r-raġel u l-mara huma dipendenti fuq xulxin biex il-potenzjal sħiħ tagħhom ikun jista’ jiffjorixxi. Minħabba n-natura differenti tagħhom, jistgħu jikkumplimentaw lil xulxin; u għax huma f’ħafna affarijiet oħra simili u l-istess, jistgħu jifhmu lil xulxin.

Id-differenzi sesswali bejn l-irġiel u n-nisa jistgħu ikunu sors ta’ kunflitt jekk dak li jkun ma jgħarafx dawk id-differenzi u jtihom valur. Huwa tajjeb li nirriflettu fuq dawn id-differenzi, iżda tajjeb niċċaraw li l-kopulazzjoni sesswali hija ħafna aktar minn sempliċi att fiżiku, iżda tinvolvi wkoll l-aktar aspetti intimi u nterni tal-bniedem. Ir-relazzjoni sesswali tal-koppja hija ċ-ċelebrazzjoni aħħarija tar-relazzjoni tagħhom fiż-żwieġ. Ir-relazzjoniji sesswali hija aktar dipendenti fuq l-intimità emozzjonali milli fuq xi teknika sesswali partikulari.

Is-sess bħala l-lingwaġġ tal-ġisem

Ir-relazzjoni sesswali m’hijiex aspett separat u distint taż-żwieġ; anzi hija estensjoni tar-relazzjoni sħiħa u espressjoni tal-għaqda u l-intimita’ tal-koppja.

Jekk il-koppja tgħallmu kif jikkomunikaw sew u regolarment (mhux b’mod superfiċjali ta’ kultant), allura se tkun eħfef għalihom biex jikkomunikaw fuq il-livell sesswali. Meta l-koppja tikkomunika fil-fond u tħoss sens ta’ intimità emozzjonali, l-intimità fiżika għandha tkun sors ta’ anqas problemi fil-futur. 

Il-lingwaġġ tal-ġisem fl-imħabba sesswali taż-żwieġ jgħid : “Inti l-aktar persuna mportanti f’ħajti; tant inħobbok li nagħti ġismi għalik. Inħobbok kif int, kull aspett tiegħek, tant li rrid li jkolli wild miegħek, li jkun parti sħiħa tagħna t-tnejn flimkien”.

L-imħabba sesswali hija essenzjali biex iż-żwieġ jimxi sew. Permezz tal-imħabba sesswali, ir-raġel u martu, il-mara u żewġha, jitkellmu bil-lingwaġġ tal-ġisem. Għalhekk il-lingwaġġ sesswali għandu jkun onest u veritier.

It-tajjeb u l-ħażin fl-imġieba sesswali

It-tagħlim tal-knisja minn dejjem kien u jibqa’ li l-atta sesswali tal-imħabba - li huwa wieħed mill-ewwel atti li bih il-koppja tikber fl-imħabba – għandu postu biss fiż-żwieġ, fejn l-għotja lil xulxin hija rigal li jingħata b’mod ħieles u b’responsabbiltà. 

Sfortunatament, il-verità u s-sbuħija tat-tagħlim tal-Knisja fuq is-sesswalità m’humiex wisq magħrufa. Il-Knisja tispjega kif l-att sesswali fiż-żwieġ huwa sabiħ, meta pprattikat skond il-pjan ta’ Alla. Hawnhekk il-Knisja tgħallimna kf nistgħu ngħarfu l-pjan ta’ Alla b’żewġ modi:

• Billi nosservaw in-natura u lilna nfusna;
• Permezz tal-Kelma ta’ Alla fil-Bibbja u fil-ħajja tal-Knisja.
  
  

• Li tħobb mingħajr irbit – dan ifisser li ma tistax timmanipola lill-parti l-oħra billi tuża s-sess bħala premju jew kastig; lanqas li tuża theddid abużiv biex tikkontrolla lill-parti l-oħra fiż-żwieġ bħala persuna. L-imħabba ma tistax tkun sfurzata bilfors.
• Li tħobb għal kollox – ma tistax tkun emozzjonalment ‘il bogħod minn martek/żewġek imbgħad tippretendi li tgħamel l-att taż-żwieġ. L-imħabba tintegra flimkien il-ġisem, il-moħħ, ir-ruħ u l-qalb.
• Li tħobb onestament – apparti atti speċifiċi ta’ adulterju, din il-wegħda tfisser li jekk tagħmel użu tal-pornografija, jew tiffantasizza dwar ħaddieħor, waqt li tagħmel is-sess ma’ martek/żewġek, huwa ta’ ħsara kbira rreparabbli għaż-żwieġ.
• Li tħobb b’mod li tagħti l-ħajja – is-sess, l-ewwel nett, jagħti l-ħajja lill-koppja nfisha. Barra minn hekk, l-att sesswali għandu wkoll l-aspett li jkun miftuħ għall-ħajja ġdida.
  
  

• Napprezzaw il-fatt li aħna maħluqa minn Alla li huwa mħabba u li ġisimna huwa xhieda ta’ l-iskop oriġinali fil-pjan Tiegħu.
• L-għan ta’ Alla huwa dak li jurina x’hinu tajjeb jew ħażin fl-użu ta’ ġisimna.
• Inkun konxju/a li bħala raġel u mara, jiena msejjaħ/msejħa biex inħobb lil marti/żewġi intimament – b’rispett u sensitività għal xulxin, billi nuża l-lingwaġġ tal-ġisem bħala riflessjoni onesta tas-sentimenti tiegħi, b’mod li nersqu lejn xulxin miftuħa għall-ħajja.
• Napprezza l-imħabba ta’ żewġi/marti bħala rigal u nifhem li lkoll għandna nħobbu lil xulxin bil-mod kif iħobb Ġesù.